I. Lanerako testuak
1.
Arra. Arraroa.
2.
Potrotaraino nago.
Bai.
Potroak ditudalako nago
potrotaraino.
Horregatik eta
gizona izatea zer den entzuteaz
aspertuta nagoelako.
Gizonezkoak gara gizonkeriaren beste biktimak.
Zakilzofreniatik askatuko gaituen mugimendu,
postmugimendu
edo megapostrockmugimendu ideologikoaren zain omen den
gizakil multzoa.
Gizona.
3.
Ideia zaharkituen depilazioa,
emozioen politika,
botereari uko egitearen indarra.
4.
Aitorpen publikoa, bat:
poesia idazten dut.
Arraroa izan naiz beti.
Arra. Arraroa.
5.
Gizona naizela diot
eta harro nago.
Gizona naizela diote,
eta arra nago.
Gizona naizela diozu,
eta arraro nago.
6.
A!!
Nola sartu naiz esku hauetan!
A!!
Nola heldu naiz bular honetara!
A!!
Nola iritsi naiz honera barrura!
7.
Gizona naiz.
Gizona naiz
nahiz eta
gizona izan.
xxi. mendean ezin da gizona izan etiketarik gabe.
Hauek dira nireak:
modernoa,
jatorra,
sentsiblea,
indartsua,
ulerkorra,
adimentsua,
elegantea baina ez gehiegi,
detailezalea baina pixka bat despistatua,
heterosexuala.
Adjektiboak dira munduko gauzarik estresagarriena.
8.
Heterosexuala izan nahi dut errudun sentitu gabe.
Feminismoa aldarrikatu.
Desioz begiratzen nauten gizonezkoen albotik pasatu
eta horrekin disfrutatu.
Sexuari buruz hitz egin, ideologia bat ez balitz bezala.
Nahi dudan bezala jantzi inauteriak ez direnean ere.
Ezpainetan muxua emanez agurtu lagunak:
lehoiak, jirafak, elefanteak
eta pertsonak.
Nortasun propioa aldarrikatzen duen
gizona izan.
Gizona.
Zer arraio da gizon bat?
9.
Begira.
Ileak ditut.
Leku guztietan,
oin azpietan izan ezik.
Hala ere, noizean behin
ile batzuk depilatzen ditut.
Sudurzuloetakoak.
Bularrekoak.
Galtzarbeetakoak.
Luzeenak behintzat.
Eta harro nago.
Eta arra nago.
Nik ere nahi dut desira nazaten.
Aspertuta nago gizonezko heterosexualen trauma ezkutuez.
Isiltasunaz.
Aspertuta nago baita ere
izan behar nukeena oihukatzen didaten
eskuindarrez eta ezkertiar postmodernoez.
10.
Aitorpen publikoa, bi:
igandeetan ez dut kinielarik egiten.
Arraroa izan naiz beti.
Arra. Arraroa.
11.
Zer edo zerk definitu badu orain arte gizona izatea zer den,
hori beldurra izan da.
Emozioak adierazteko beldurra.
Ahul agertzeko beldurra.
Barregarri geratzeko beldurra.
Galtzaile izateko beldurra.
Barrutik biluzteko beldurra.
Beldurrari aurre egiteko irakatsi diguten modu bakarra
beldurra eragitea da.
Beldurrari hostia pare bat eman eta kito.
Beldurraren kontrakoa ez da ausardia.
Beldurraren kontrakoa beldurrarekin bizitzen jakitea da,
inor izorratu gabe.
12.
Nire aurrekoek erakutsi didate gizonezkoa izatea zer den:
nire aurreko gizonezkoek
eta batez ere
gizonezkoen rola defendatu duten
nire aurreko emakumeek.
13.
Manifestu ezinezkoa:
emozionalki, fisikoki, zakil-zikloki heterosexuala naiz. Eta zer?
Arrazionalki bisexuala naiz. Eta zer?
Ideologikoki gaya naiz. Eta zer?
Trans, intro, hiper, mega, homo, super, lesbo, queer...
funtsean, faxismoaren birziklapenaren kontra egiten duen
zoriontasun mota guztien aldekoa naiz.
14.
Lagunok,
gogoko ditut
titi handiei buruzko txisteak.
Entzuten ditudan bakoitzean
nire ama etortzen zait burura
ezpainak handituak
hortzak odolez beteak,
edo herriko jaietan bortxatu zuten
gure koadrilako laguna.
Kar-kar, oroitzen?
15.
Aitorpen publikoa, hiru:
emakumeen kontrako biktima izan den
gizonezkoa naiz.
Arraroa izan naiz beti.
Arra. Arraroa.
16.
Emakumeen kontrako bortxakeria
guda totala da,
gatazka dosifikatua,
Isilpeko mundu-gerra.
Noiz idatziko dituzte kolpatutako,
umiliatutako,
baztertutako emakumeek historia liburuak?
Nolakoak dira kolpatutako,
umiliatutako,
baztertutako,
eraildako emakumeen semeek
idatzitako nobelak?
Non daude orain kolpatutako,
umiliatutako,
baztertutako,
eraildako emakumeen semeak?
Nolako gizonak dira?
Zer ikasi dute?
17.
Imajina dezakezue zer den
emakumearen kontrako bortizkeria jasan duen
gizonezkoa izatea?
Zeure burua aitaren ispilu hautsian ikustea?
Amak hazitako gizona naiz.
Bizarra kentzeko aparrik gabe munduan abiatu den nerabea,
gauetan galtzontziloa zikintzen duen hazia ezkutatu beharrean den
norabiderik gabeko gaztea.
Ama bati ez litzaioke monumentu bat egin behar,
ama bati gizartean boterea eman behar litzaioke,
ahal dela boterearen ideia erautsi dezan.
18.
Aitorpen publikoa, lau:
ez dakit entxufeak konpontzen.
Arraroa izan naiz beti.
Arra. Arraroa.
19.
Ni naiz nire aita.
Begira iezadazue: ni naiz
nire aita.
Eta ez aitaren iguala naizelako, ez.
Neure buruari erakutsi behar izan diot bizarra mozten,
bizitzaren saminari aurre egiteko tresnak bilatzen.
Ez da erraza haur zarelarik etxera iritsi eta
zure ama negarrez topatzea,
aurpegia ubelduta.
Ez da erraza eskolatik bueltatu eta
telebistako pantailan ikustea, gorriz idatzita:
akabatuko zaitut.
Pentsatu duzue inoiz nolakoa izango den
norbaiti lepoan labana sartzea?
Nik bai.
Ama defendatzeko.
Baina ez dut egin,
ez nuen neure aita akabatu
ez nuelako gizon hori izan nahi.
20
Nolakoa da iragana errepikatzen ez duen gizona?
21.
Aitatasuna titi depilatu bat da.
Emakumeek bere gorputzarekin nahi dutena egiteko
erabaki eskubidearen aldekoa naiz.
baina ni ez naiz sekula erabakitzeko aske izango.
Negoziatzeko edo inbertitzeko aske, asko jota.
Hala eta guztiz ere,
nik ere aita izan nahi nuke,
neure buruari gauzak beste modu batean egin daitezkeela frogatzeko.
Edo saiatzeko behintzat.
22.
Mundua, modua.
Zein da gizonezkook munduan egoteko dugun modua?
23.
Mundu osoaren aita izan nahiko nuke,
injustiziatik babestu zanpatua den oro,
eguna odolak estalia datorrenean
pasako da esateko gaitasuna eduki!
Ahula sentitzen den hori babesten duen
figura sendoa izan nahiko nuke,
hau da, funtsean: topiko puta bat,
bizitza errazagoa egingo didan topiko puta bat.
24.
Aitorpen publikoa, bost:
kirolari txarra naiz.
Arraroa izan naiz beti.
Arra. Arraroa.
25.
Bizi gaituen bizitza honetan
baztertuen artekoa da nire familia.
Eta baztertuetan oraindik kategoriarik, gerrillarik,
kantarik edo bertsorik sortu ez zaienen artekoa.
Eta ni hortaz, sailkatu gabeko baztertuen artekoa:
emakumeen bortizkeria jasan duen gizonezkoa...
26.
Aitorpen publikoa, sei:
bizikleta gainean desastre hutsa naiz.
Arraroa izan naiz beti.
Arra. Arraroa.
27.
Ea, esaldi arranditsu bat:
kapitalismoak baztertutako guztien aldekoa naiz.
Bereziki itsusien aldekoa.
Haietako bat naizelako.
Gizona izan nahi duen gizona,
bufoia, poeta,
aurrelari eskasa, defentsa okerra, atezain kaskarra,
kakanarrua, iletsua, burusoila,
etxetresna elektriko konpontzailerik traketsena.
28.
Honela hitz egiten du nire ahotsak:
A... o... mmm...
Ua! Plastilinazko pilak dituen megafono bat naiz!
A... o... mmm...
29.
Arra! Patua!
Ez naiz,
ez nago,
arra! Patua!
30.
Maita nazazue, kabroi alaenak, maita nazazue!
Ez al duzue ikusten gauza garrantzitsuak egin ditzakedala?
Ez.
Ez duzue ikusten.
Eta egia esan, eskerrak.
Ezingo nuke jasan jende guztiak ni maitatzea.
Gutxi batzuekin konformatzen naiz:
maita nazazue, kabroi alaenak, maita nazazue!
ez al duzue ikusten beharrezkoa naizela?
Ez.
Ez zaituztet ni maitatzera derrigortuko.
Ez naiz estatua edo konstituzioa izango
gure arteko harreman honetan.
Itsusien edertasuna konpartitzeko prest nago.
31.
Aitorpen publikoa, zazpi:
Ezetz, hostia, ez dakidala
zein den nire lagunen autoaren marka!
Arraroa izan naiz beti.
Arra. Arraroa.
32.
Buztan-burua.
Astapotroa.
Ahoberoa.
Zakila naizela diote askotan.
Nire zakilak ez daki disimulatzen.
Nire aurpegiak, ezta ere.
Egia esatea beste biderik ez dut:
gustukoa zaitut,
2343 ile ditut gorputzean, metro koadro honetako gizonik politena naiz.
33.
Zakilarekin jotzen dut larrua
eta ipurdiarekin,
gerriarekin,
eskuekin,
oinekin,
mingainarekin,
sudurrarekin,
begiekin,
birikekin,
gibelarekin,
globulu gorriekin,
hesteekin,
hezurrekin,
bihotzarekin.
34.
Zuek badakizue zer den gizon bat?
Zuek badakizue nolakoa den gizona izan nahi duen gizona?
35.
Sentikorra eta indartsua.
Jende gehienak bezala, azken finean.
Nik ere badakit zer den borrokatzea,
nik ere sartu dut inoiz ukabila aurpegi batean.
Ni ere banaiz min emateko gai.
Nik ere egin dut negar maitasunezko filma batekin.
Munduko gauza itsusiekin hunkitzen naiz,
pertsonen arteko keinu hautsiekin,
samurtasunarekin.
Eskutik heldu baina lotu gabe, leunki,
musika gozoa jarri ezpainetan...
goza ditzagun bihar ahaztuko gaituzten plazerak!
Sentikorra eta indartsua,
min emateko gai,
jende gehiena bezala.
36.
Aitorpen publikoa, zortzi:
ez dakit igeri egiten.
Arraroa izan naiz beti.
Arra. Arraroa.
37.
Beti miretsi ditut ezizenak dituzten pertsonak.
Nik ez dut inoiz halakorik izan.
Ezizenarekin ezagutu ditudan pertsona gehienak gizonezkoak
dira:
Txibi
Txato
Treku
Fiti
Junki
Perku
Trosko
Zato
Txiki
Peli
Txelu
Azpi
Gogi
Murru
Txokolo
Potxolo
Metralla
Nik ez dut inoiz ezizenik jaso.
Behin saiatu nintzen
neure buruarentzat ezizen bat sortzen
eta ahoz aho zabaltzen: azul.
E azul! Benga azul! Tiraiok azul!
Ez nuen arrakastarik izan.
Nola zabaldu daiteke norberari buruzko zurrumurru bat?
Arraro begiratzen zidaten denek. Azul.
Eskerrak ez nuen arrosa esan, edo horia.
Mutilak ez al dituzte ba txikitan urdinez janzten?
Ba horixe nahi nuen nik, ezizen maskulino bat:
Azul!
Agian ez dut lortu neure buruaren karikatura izatea,
eta horregatik ez didate inoiz ezizenik jarri.
Nire aurpegiak ez du ezeren antzik.
Ez dut lortu sekula modu orijinal batean barregarri geratzea.
Arraroa izan naiz beti.
Edo agian besteak dira arraroak direnak?
38.
Aitorpen publikoa, bederatzi:
apustu egiteak gogaitzen nau.
Arraroa izan naiz beti.
Arra. Arraroa.
39.
Gizona.
Munduan egoteko modu bat.
Edertasuna arnasteko modu bat.
40.
Behin poesia idazten hasi nintzen.
Arraroa izan naiz beti.
Arraroa nintzen besteentzat, poesia idazten nuelako.
Eta hara non bat-batean, poesia politikoa idatzi nuen.
Halako batean gizon bilakatu nintzen batzuentzat
gauza inportanteak esaten nituelako,
nahiz eta inor gutxik irakurri,
nahiz eta euskaraz egin,
baina gizon egin nintzen,
poesiari esker.
Hori bai,
poesia idazten jardun nintzen lehenago urte luzez,
“Arraroa” etiketa buztanetik zintzilik.
Jasanezinak zaizkit
banderak zintzilikatu nahi dituzten pitilin mastak.
41.
Gizona.
Munduan egoteko modu bat.
Puzkerra.
Korroka.
Pixa egin edozein lekutan.
Apurtu, suntsitu, tirokatu, torturatu.
Neskak barregarri utzi
haien atentzioa bereganatzeko.
Sexuari buruzko txisteak egin.
Kanpaia jo eta besteei esan.
Hau al da gizonezkook munduan
egoteko dugun modua?
42.
Gizona.
Edertasuna zurrupatzeko modu bat.
Ez da erraza gizon ederra izatea.
Erakargarria.
Zure segurtasun eza guztia
norbaiten aurrean gainditzea lortuta ere
gazta bola iletsua azalduko zaizu ustekabean,
izter zabalegien gainetik,
arropa eranztean.
Sedukzioak droga baten moduan
kontsumituko zaitu,
biluzteak izua sortzen dizun arren.
Ideia modernoen depilazioa!
Itsusien edertasuna!
Nire azazkalak politak dira.
Esan dezake inork horrelako zerbait
inozoa sentitu gabe?
Nik bai.
Edertasuna.
Gizona izateko moduak
lotsarik gabe asmatzearen edertasuna.
43.
Aitorpen publikoa, hamar:
batzuetan ez dut gogorik larrua jotzeko.
Arraroa izan naiz beti.
Arra. Arraroa.
44.
Behin emakume bat maitatu nuen.
Gero beste emakume bat maitatu nuen,
eta gero emakume hori maitatu nuen berriro.
Azkenean, emakume batek maitatu ninduen ni,
eta hura kasualitatea,
baita nik bera ere.
A ze lana, maitatzea.
Emakume hura baina, ez zen nirea.
Haiek lanak nirea izan ez zedin!
Hau da zure neska,
zure bikotea,
zure puta,
zure zakurra,
zure tximino makilatua.
Emakume hark ez zuen jaberik,
bere senari baino ez zion egiten men,
eta batzuetan, hori ere ez.
Ez genuen elkar erosi,
ez elkar alokatu ere;
okupatu bai, agian.
Elkarren gogoak eta gorputzak okupatu genituen,
batak besteari plazera emanez
inorena ez den lurraldean.
45.
Hauexek dira lotsaren lege ez idatziak:
tabernetan dantzatu inor bultzatu gabe,
neskekin hitz egin mozkorra egon gabe,
publiko aurrean kantatu,
kontzertuetan gorputz osoa astindu eta ez soilik burua,
txuleta edo saihetsak ez diren jakiak prestatzen jakin,
arropa erosi aholkularirik gabe,
oinetako azazkalak moztu,
familiako bazkalosteetan mahaia jaso beste gizonezko batzuen aurrean.
Ez umiliatu inor popularra izateko.
Nola izan gizona adjektiborik gabe?
Nola izan gizona eta ezkertiarra,
modernoa,
jatorra,
sentsiblea,
indartsua,
ulerkorra,
heterosexuala... lotsa sentitu gabe?
Zakilarekin pentsatu
errudun sentitu gabe.
Titiak ikusi eta
tripak
besoak
izterrak
belarriak
sudurrak
hankak
ahotsak
begiradak
pertsonak.
Biluztu.
Erotikaren zapore gozoa dastatu
begiradarekin inor bortxatu gabe.
46.
Edertasuna.
Isilik geratzen ez direnen
edertasuna.
Konformatzen ez direnen
edertasuna.
Umiliazioa onartzen ez dutenen
edertasuna.
Bortizkeria borrokatzen duen
bortizkeria poetikoa:
munduko torturatzaileak,
suizidatu zaitezte!
47.
Ez naiz telebistako iragarkietan azalduko
eta hala ere jasanezina zait gizonezkoen kolonia,
ez ditut gogoko tenis-galtzerdi zuriak.
48.
Biluztu naiz:
zarpaila eta sentsuala,
beldurtia eta ausarta,
ahula eta indartsua,
traketsa eta abila,
fina eta gustu txarrekoa,
konprometitua eta ezjakina.
Munduko itsusirik ederrena eta ederrik itsusiena.
Arraroa izan naiz beti,
arra patua izatea ekidin nahi izanagatik.
Arraroa eta horregatik, batzuetan,
askea.