III
haizearen distira eta bizitzaren dardara
gerturatzen ari da
gorputz guztien demokrazia ekarriko duen heriotza
ateak irekitzera zoaz
herdoilduak daude baina
odolezko eta burdinazko sustraiekin
aurora arte jarraituko du orroak
kilkerrek agortu arte egingo dute kanta
entzuten ari diren zakurrak bilakatzen garen bitartean
ikusi ilargiaren magaletik azken musuak irristatzen
sabeleko liliak aitaren eskuak amarenak
umeen negarrak hildakoen arnasak
eroen barruko suak eta argitasunak
denbora maitasuna egiten ari da denborarekin
luzatzeko plazeraz bizirauteko
egunak bere buruaz beste egin baino lehen
itzalei izenak jarri behar dizkiegu
hildakoenak har ez ditzaten
heriotza itzaletan biluzik etzaten denean
heriotza urik gabeko euria begietan harrapaturik
zuhaitz bati bezala kendu digute azala
zentzumenak sentimenduak zatika
hainbeste urte bizitza imitatzen
ispilu jada zaharkituetan eraikitzen
baina ez gara hildako guztiak egunsentian sartuko
munduan sartu ez garen bezala
beldurra heriotza konpartitu ezinaren aurrean
gorputzak ihintzaren urjentziara irekiak
azken gorozkiak zizak txistuak zauriak odolak
azalak azalen kontra
bizitzaz zurrupatu
munduak kanibalak bilakatzen gaituenez goazen elkar irenstera
irrikatutako arintasuna azkenean
bularreko ileak begietan amiltzen
aurora, jarri begiak azalean
hilotzak ikusten hasi naiz
ahotsik gabeko gau bat bezala erortzen
dantzan ari dira eskeletoak
enaren azkeneko kantua
igelek kloaketan bilatzen dute
negarrez ari dira malko guztiak bakar batean
heriotzaren korua konposatzen dute
zergatik ez dute aurretik negarrik egin
hitz egiten ari den ahots hau ez da gurea
euri asko egin du geroztik
esnatzen ari dira zuhaitzen itzalak
egunsentiarekin bat egiteko
beso erreetako aurora malkoetan desegiten da
beti egongo da espazio bat kanpoko espazioaren ondoren
baina leihoak, non daude leihoak?