5. Etxean
bittor bizkarra erakusten duela eserita dago aulkitxo batean. kizkitza hanken artean mozketan ari zaio, guraize hots handia entzuten da.
bittor dar-dar batean, ikara-ikara eginda.
BITTOR: Ai, ai! Kontuz, Kizkitza!
KIZKITZA: (gizonaren intziriekin nazkatuta) Kontuz-kontuz ari naiz! Zerorrek egin nahi duzu?
BITTOR: Ez, ez; ni ez naiz gauza, ezingo nuke. Ez dakizu ze sentsazio... zer-nolako ikara ematen duen guraizeekin hor ibiltzeak.
KIZKITZA: Ya, baina ile luze hauek... koxkorretan, aurrena, guraizeekin, eta izterretan elektrikoarekin, eta gero azal guztian argizaria.
BITTOR: Argizaria? Argizari beroa? Zuk hanketan eta bibotean ematen duzuna?
KIZKITZA: Bai.
BITTOR: Baina hori oso mingarria da, ezta?
kizkitzak baietz buruaz.
KIZKITZA: Uste dut txirrindularitza eunukoentzako kirola dela.
BITTOR: Badakizu Edu Ferkxek zer egin zuen? Bueno, ez jakitea hobe.
kizkitzak martxan jartzen du depilatzeko aparatu elektrikoa. Burrunbak areagotu egiten du bittorren izu-ikara. Besoak luzatzen ditu, kizkitzari ez dio hurbiltzen uzten.
BITTOR: Ez, ez, ez!
kizkitzak eskuan jartzen dio aparatua.
KIZKITZA: Egin zeuk, pelma!
kizkitzak argizaria duen eltzeari eragiten dio. bittor behin eta berriz saiatzen da aparatua izterretara eramaten baina bost zentimetrotara duela urrundu egiten du.
KIZKITZA: (Begiratu gabe) Pasa behin eta berriz, hartara argizariarekin min gutxiago.
bittor lehen bezala, ezinean. Hurbiltzen da kizkitza argizaria duen ontziarekin.
BITTOR: Non duzu zure amak oparitutako errosarioa?
KIZKITZA: (harrituta) Errosarioa? Kajoiren batean egongo da.
BITTOR: Ekarri, bilatu eta ekarri, mesedez.
KIZKITZA: Depilatzeko, errosarioa?
BITTOR: Zuk ekarri, bale?
Badoa kizkitza.
BITTOR: Dorletako Ama Birjina, lagun iezadazu momentu larri hauetan eta ni zure ermitara joango naiz non dagoen jakin bezain pronto!
Badator kizkitza. bittorrek zakilaren inguruan kiribiltzen du errosarioa.
KIZKITZA: (barrez) Seguru nago sakrilegio handiagorik ez dagoela egiterik.
kizkitza argizaria ematen hasten zaio.
BITTOR: Ze bero dagoen! Mekauen!
kizkitza barrez, algaraka ia.
KIZKITZA: Errosarioa pitilinean eta depilatzeko argizaria koxkorretan!
Heldu egiten dio neskak, erabakitasunez, lehortutako argizariari.
Serioturik kizkitza. Gorpu alaiagoak ikusi izan dira bittor momentu horretan baino.
KIZKITZA: Prest?
BITTOR: Lore-sortak, garaipenak, loria! Tira!
Argia itzaltzen da Tarzanen oihua entzuten dugunarekin batera. Argia pizten denean bittor palangana batean dago eserita. kizkitzak eskuetan hauxe du: bi argizari zerrenda, ilez beteta, izterra bezain luzeak; bi zerrenda horiek batu egiten dira koxkorretan jarritakoaren bidez; hor ere ileak, jakina, eta, baita ere, itsatsita, errosarioa.
KIZKITZA: (eskuan duenari begira) Impresionante, impresionante; errosarioa ere itsatsi egin da eta... zer moduz zaude, gizona?
BITTOR: Bueeeno.
kizkitza hurbildu eta palangana barrura begiratzen du
KIZKITZA: Dena osorik dagoela ematen du. (Musu ematen dio masailean) Gaur “Tres en uno” ez, ezta?
BITTOR: Gaur igual ez.