1. ONGI ETORRIAREN PAYADA

 

patxo eta mikel publiko artetik agertuko dira. patxo gitarra batekin. mikel marakekin. Kantuan hasiko dira.

 

PATXO: Jaun andreak, horra gure asmoa:

            Gure kontura zuek barre egitea

            Gauza bakarrak axola digu guri

            Zuek ordu betez ondo pasatzea

            Publikoa dago nere uste apalean

            Oso serio ta inkognitaz betea

            Espero dugu guztioi zaizuela

            Atsegina izango hemen egotea.

MIKEL: Ez genuke inolaz ere onartuko

            Publikoa gau honetan aspertzea

            Diruak ez digu axola ez zaigu inporta

            Zuek sarrera ordainduta izatea

            Gure umorea nola den badakizue:

            Inozo, baldar ta ganora gabea

            Zin dagizuet ez zaiola inori

            Damutuko antzokira etortzea.

PATXO: Milesker eta ongi etorriak!!

 

Publikoak txalo egiten du. mikelek kanta bukatutzat eman du.

 

PATXO: Txaloak!! Ez genuen espero. Gustatu zaie, Mikel. Goazen berriro kantatzera.

MIKEL: Berriro?

PATXO: Bai, baina oraingoan biok batera, nahasturik.

MIKEL: Nahasturik? Baina...

 

Argudiatzeko astirik eman gabe, patxo kantatzen hasiko da. mikelek jarraitu beste erremediorik ez du. Kanta nahastuta kantatuko dute, bakoitzak lerro bana kantatuaz.

 

PATXO: Jaun andreak, horra gure asmoa

MIKEL: Publikoa gau honetan aspertzea

PATXO: Gauza bakarrak axola digu guri

MIKEL: Zuek sarrera ordainduta izatea

PATXO: Publikoa dago nere uste apalean

MIKEL: Inozo, baldar ta ganora gabea

PATXO: Espero dugu guztioi zaizuela

MIKEL: Damutuko antzokira etortzea.

            Ez genuke inolaz ere onartuko.

PATXO: Gure kontura zuek barre egitea

MIKEL: Diruak ez digu axola ez zaigu inporta

PATXO: Zuek ordu betez ondo pasatzea

MIKEL: Gure umorea nola den badakizue:

PATXO: Oso serio ta inkognitaz betea

MIKEL: Zin dagizuet ez zaiola inori

PATXO: Atsegina izango hemen egotea.