XII. eszena

 

Bi kaiolak. Batean gizon bat dago, bestean presozain bat. Burdina-hesietan daude, norbera bestearen alderantz begiratuz, elkar ikusten ez duten arren.

 

PRESOZAINA: Kartzela askotan egona al haiz hona etorri baino lehen?

GIZON BAT: Ez ninduan ni etorri, ekarri egin ninditean. (Isilunea). Batzuetan bai.

PRESOZAINA: Zeintzuetan?

GIZON BAT: Bresteko gotorlekuan, Clairvauxeko zentralean, Moulinseko isolamenduan, Naonedeko isolamenduan...

PRESOZAINA: Hori duk hori ezin gelditua!

GIZON BAT: Eta hi?

PRESOZAINA: Nik ere batzuk ezagutu ditiat: Fresnes, Fleury, Les Baumettes, Tolosako kartzela zaharra, Val-de-Reuil...

GIZON BAT: Ez zagok gaizki.

PRESOZAINA: Lehen aldia al duk kartzelan?

GIZON BAT: Bai.

PRESOZAINA: Baita ni ere... Kontua duk behin sartu eta ez naizela oraindik atera!!!

 

(Barre egingo du).

 

GIZON BAT: Zenbat denbora daramak barruan?

PRESOZAINA: Aurtengoarekin hamar egingo ditiat. Gazte hasi ninduan eta...

GIZON BAT: Eta ateratzeko datarik?

PRESOZAINA: Puska baterako diat. Eta hik? Zer ziotek hire abokatuek?

GIZON BAT: Nirea politikoa duk. Abokatuek ezer gutxi egin zezaketek.

PRESOZAINA: Baina zenbat eskatzen ditek.

GIZON BAT: Ez diat begiratu.

PRESOZAINA: Terrorismo aferak beroak dituk. Hildakorik al daukak?

GIZON BAT: Esan diat ez dudala begiratu zer egozten didaten. Dena dela guretzat beti duk eskaera handiena. Guretzat aldatzen ditiztek legeak, espresuki.

PRESOZAINA: Baina zuen borroka horrek ba al dik etorkizunik? Nik ez diat uste inoiz ezer lortuko duzuenik.

GIZON BAT: Asko lortu diagu dagoeneko. Bizirik zagok gure Herria.

PRESOZAINA: Bai, bai, nik ulertzen diat zuen borroka, e? Baina erabiltzen dituzuen metodoak dira arazoa.

GIZON BAT: Noski hiri hobe irudituko zaik bonba atomikoa erabiltzea...

PRESOZAINA: Ez, ez, esan nahi diat ez duzuela irabaziko inoiz. Frantziak eta Espainiak ez ditek sekula Euskal Herria utziko.

GIZON BAT: Ikusteko zagok.

PRESOZAINA: Zenbat denbora daramazue borrokan? Merezi al du?

GIZON BAT: Eta nola!

PRESOZAINA: Baina sufrimendua baizik ez duzue eragiten, besteei, zuei eta zuen senitartekoei.

GIZON BAT: (Isilik).

PRESOZAINA: Ez al duzue hobe bide baketsuetatik borrokatzea?

GIZON BAT: Zein bide baketsu erabili behar dugu?

PRESOZAINA: Hauteskundeak, jendea konbentzitu,.

GIZON BAT: (Ahoa irekiko du, ez du ezer esango ordea).

PRESOZAINA: Armak erabiltzen dituzuen bitartean normala ere bada, ezta? Mehatxupean ez dizuete ezer onartuko.

GIZON BAT: (Ahoa irekiko du eta hitzak ahoskatu arren ez da hotsik entzungo).

PRESOZAINA: Ausarta izan beharra zagok bizitza honetan. Norberaren porrota onartu eta kito. Gizartearekiko zorra ordaindu.

GIZON BAT: (Berdin jarraituko du, isilean ahoskatuz).

PRESOZAINA: Gizonki jokatzen jakin beharra zagok. Hi bahaiz bada indarra nork duen, boterea nork duen, azken batean arrazoia nork duen ikusteko bezain buru argia. Horrela iruditzen zaidak niri bederen.

GIZON BAT: Aizak, Georges.

PRESOZAINA: Zer, Le Basque?

GIZON BAT: Gora eta!

PRESOZAINA: Zer?

GIZON BAT: Gora eta!

 

(presozain bat isilik geratuko da argiapixkaka apaltzen den artean).