Sabino
Luis Haranburu Altuna
Sabino
Luis Haranburu Altuna
Luis Haranburu, 1986
Sabino
Luis Haranburu Altuna
Luis Haranburu, 1986
[aurkibidea]

 

(Argiak itzali aurretik xuberoar pastoraletako doinu ezagun bat entzuten da eta salako argiak itzaltzen direnean errejenta dator proszenioara eta handik kantatuko ditu ondorengo bertsoak. Publikoari so eta pastoraletan errejentak erabili ohi duen doinuaz abestuko du).

 

ERREJENTA:

            1.— Euskaldunek memoria

                        galdua zuten iadanik

                        borroka alferretan

                        zebiltzen nahasturik.

            2.— Mendearen bukaera

                        hurbil zegoenean

                        izarrik ez zitekeen

                        ikusi euskal ortzean.

            3.— Euskara barreiaturik

                        baserri zokoetan

                        gero eta urriago zen

                        euskaldunen ahotan.

                        4.— Bilboko hiria zen

                        zagia bezala puztu

                        baina ardo gorriaren ordez

                        pasmoaz zen izorratu.

            5.— Lagi Zaharrak etenik

                        Jainkoa zen desterratu

                        euskaldunen askazia

                        bertan behera zen abiatu.

            6.— Tamaina hartako sortean

                        norbait hartu zuen ikarak

                        oro eta guzti zituela

                        amets berriaren kontrakoak.

            7.— Abandoko republikan

                        republika Abandokoan

                        euskal Aberria jaio zen

                        Ibaizabalen alboan.

            8.—Euskal gorpu heria

                        sapelatsez inguratua

                        bele beltzen jakia zen

                        euskal haragi odoldua.

            9.— Maiestate handiaz ordea

                        hegatu zen arranoa

                        txori gaiztoak uxatuz

                        salbatzeko euskaldungoa.

            10.— Sabino izena du

                        Abandoko arranoak

                        berari zor diogu

                        osasuna euskaldunak.

            11.— Arana ta Goiri Sabino

                        euskaldunen aita zuhurra

                        Berak eskuratu zigun

                        asaba zaharren altxorra.

            12. — Orain dezatutela ikus

                        Sabinoren biziera

                        berbera izan dadila

                        euskaldunen portaera.

 

(Ohiala jaso aurretik erretiratzen da errejenta).