|
Gabon-gabontzeta, Arkotxa'tar J.A. SEIGARREN AGERALDIA ATAUN eta MARI-DOMINGI (Nexkatoen Gabon-abestiak etzungo dira an inguruko etxeta. Etzungo dan abestia:) «Jesús, María, María, Jesús, Jesús, María.» Izarra bularrian, Semia sabelian, A zer donzella ederra, Itxasoaren erdian. Jesús, María, María, Jesús, Jesús, María. Izarrak ertetzen du Odeiaren atzetik; Baita Semiak ere Amaren sabeletik. Jesús, María, María, Jesús, Jesús, María. Jaio da, jaio-jaio, Au dala jaiotzia, Semia eginda gero, María dontzellia. Jesús, María, María, Jesús, Jesús, María. ATAUN: (Lenengo bertsoa abesten dutenean agertuko da, batera ta bestera ibilliaz MARI-DOMINGI agertu arte.) MARI-DOMINGI: (Irugarren bertsoa bukatzen danean agertuko da, DON PELLO'ren etxetik. Aurreko jantzi-zuriz eta maleta bat eskuan duala.) Agur, Ataun. ATAUN: (Oso alai.) Arratsalde on, Mari-Domingi! Igesi altzuaz? MARI-DOMINGI: Ez, Ataun. Nere nagusi-etxekoandreak dira, Tolosa'ra dijoazenak. ATAUN: Eguarriak igarotzera, noski? MARI-DOMINGI: Igarri diozu. ATAUN: Eta zuk, ez al dezu joateko asmorik? MARI-DOMINGI: Badet asmoa; Tolosa'ra ez ordea. ATAUN: Nora joateko asmotan zera? MARI-DOMINGI: Nere jaiotetxera: Amitx basarrira. ATAUN: Urruti al dago? MARI-DOMINGI: Ez ain urruti. Ordu ta erdian aixa iritxi diteke. Joango al ziñake? ATAUN: Nora, basarrira? MARI-DOMINGI: Bai. Zuretzat aña janari badegu-ta, tokia ere bai. ATAUN: Nere pozik aundiena litzake. Badakizu, Ataun'a joaterik eztet eta, emen, kalean, ostatuko bakartadea ezta atsegingarri izaten Gabon-Jaietan. MARI-DOMINGI: Egia. Gizon bakarra ere motza izaten da munduan. ATAUN: Ain motza eze. MARI-DOMINGI: Zerbait pentsatu bearra daukazu orduan. ATAUN: Aspaldi pentsatua det; ezin jarraitu izango det onela. MARI-DOMINGI: Ez bear beintzat. Ataun aldean ere, neska gazte lirañak badira-ta. ATAUN: Praka-gorri zaleak eztituzu Ataun'go neskak. MARI-DOMINGI: Ondo jantzi dotorea da mikeletearena. ATAUN: Uste det. MARI-DOMINGI: Baita nik ere. ATAUN: Eta zure gurasoak orrela uste al dute? MARI-DOMINGI: Eztirate iñoiz ezetzik esan. ATAUN: Joango ote naiz ba? MARI-DOMINGI: Zuk nai badezu? ATAUN: Zurekin joatekotan bai. MARI-DOMINGI: Joatekotan... nerekin joan bear izango dezu. Basarrirako biderik eztakizu, ta lagunik ere ez an. ATAUN: (Pozez.) Ta nik zu, izan laguna. MARI-DOMINGI: (Irriparrez.) Laguna ta... ATAUN: Zerbait geiago ere bai, ezta, Mari-Domingi? MARI-DOMINGI: Orrela este det nik. ATAUN: Orrelaxe da izan ere. Lagunduko dizut geltokiraño. (Joaten dira.) Gabon-gabontzeta, Arkotxa'tar J.A.
|
