|
Begia begi truk, Yon Etxaide VIII'gn. jardunaldia BERTRAND eta YOHANA BERTRAND: Gizaseme atsegiña benetan jaun Kuntia. Ba-dizu orretxek gazte maiteminduen berri. YOHANA: Ene aitak baiño geiago, bai, beñepein. Eztut gizon gogorragorik ezagutu gaztien biotz-sentipenak aintzakotzat artzeko. BERTRAND: Nolabait ere ardietsi dugu gutarteko maitasun sutsua onetsi dezan. YOHANA: Bai, ori iritxi dugu. Baiñan, lortuko al-duzu zure aita nireak eskatzen dizun itun ortara makurtzea? BERTRAND: Alegiñak eginen ditut ene aita onez-onean irabazteko. YOHANA: Eta onean lortzen ezpa'duzu? BERTRAND: Aita-iltzalle biurtuko naiz. YOHANA: Bertrand, orrelakorik ez! Sekula ez! BERTRAND: Eztut uste ortara iritxi bearko dugunik; baiñan, gure maitasunera makurtuko ezpa'litz, eztukegu beste biderik. YOHANA: Ez, Bertrand, ez, Jaungoikoa'k zigorkatuko gaitu. Lenago... BERTRAND: (Asaldatuta, itza ebakiz.) Lenago, zer? YOHANA: Uztea obeto dugula, alegia. BERTRAND: Nola esan dezakezu orrelakorik? Zuk benetan maite al-nauzu, Yohana? YOHANA: -Bertrand, zuk ba-dakizu maite zaitutana. Baiñan, nola ilko duzu zerorren aita gure alkartasunaren oztopo delako? Zer erru dauka berak? BERTRAND: Eta zer erru daukagu guk? (Eskuak alkartuz.) Gu biok batu egin bear dugu. (Besarkatuz.) Orrelaxe, tinka-tinka, estu-estu, maitasunik sutsuenaz, eta gure batasunerako oztopo ditezkean guziak jo ta garbitu bear ditugu, zuzen ala oker ari geran begiratu gabe. YOHANA: Bildurtzen nauzu, Bertrand. BERTRAND: Yohana: etsiko ote zenuke ni gabe bizitzen? YOHANA: Ez, Bertrand. BERTRAND: Nik ere ezin nezake, bada. Eriotza naiago dut, baiñan, au ezpadatorkit, neronek ilko dut traban jartzen zaiguna. YOHANA: Bertrand, baiñan gizon-iltzalleak eztute ando bukatzen. Arrapatuko zaitute eta urkamendira eraman aita-iltzalletzat salatuta. BERTRAND: Ez zaitzala uste orrek kezkatu. Ene aita nork il duen eztu iñork jakingo. YOHANA: Pentsaturik ote duzu, apika, zure aitari bizia nola kendu? BERTRAND: Enaiz orretan pentsatzen jardun, baiñan burutik pasatu zait. YOHANA: Jaungoikoa'k barka bekizu! BERTRAND: Etzaitez orrela illundu, Yohana. Seguru aski ezpaitugu orretara jo bearrik izanen. Alabearrak ortara bultzako ba'nindu, ordea, ba-da gure eize barrutian amilpe bakarti bat... Edozer aitzeki edo aki-akula asmatuta, eize-taldekoen artetik bakanduta aita ara eraman nezake. Bultzaka txipi bat aski litzake ene egitekoa amaitzeko. YOHANA: Bertrand, goazen, goazen emendik aguro, ikara ematen didazu-ta. BERTRAND: Elizuke orrek ikaratu bear, Yohana, gure soin-biotzak betiko ez alkartzeak baizik. YOHANA: Ba'liteke, Bertrand, baiñan, goazen, goazen aguro, buru au izu-laborriz irakiten baitut gal-gal... (Bijoaz.) OIALA Begia begi truk, Yon Etxaide |